唔少嘅旅客去過台灣之後 ，都會對台灣人濃厚嘅人情味感到印象深刻，而不斷造訪， 上年來自亞洲地區就高達962萬人，而港澳地區因為語言相通，台灣嘅物價又相對平啲，好食又好玩，所以呢幾年掀起去台灣觀光嘅熱潮。

台灣依家有高鐵(Taiwan High Speed Rail, THSR) 以及大眾捷運，旅客去台灣觀光，交通非常方便。而台灣捷運自今（2017）年3月開始啟動市區預辦登機服務之後 ，亦都令台北成為亞洲第四，全球第五個可以預辦登機嘅城市 ，到台灣自助旅遊或者商務傾生意嘅旅客 ，從飯店check out之後，喺飛機起飛前三個小時 ，就可以先喺機場捷運A1台北車站市區，辦理預辦登機同埋行李託運啦 。

舉例嚟講，以前旅客因應唔同航空公司嘅規定 ，需要至少提前兩個鐘頭去到桃園機場 。但係台灣最新啟用嘅市區預辦登機服務，畀旅客可以喺朝早六點鐘到夜晚九點半之間 ，喺台北市中心預先辦理預辦登機，同埋行李託運，咁樣旅客就可以大幅減少喺機場排隊等候嘅時間，仲可以利用慳落嘅時間行吓街 ，食吓道地小食 ，之後再搭機場捷運或者其他交通工具去機場 。

為咗減少旅客排隊嘅時間 ，台灣市區預辦登機服務一共提供三種方式，旅客可以選擇先透過網絡同埋手機 ，喺航空公司嘅網站上 ，預先online check in 。並且將登機證上面嘅QR code download到手機 ，然後透過A1台北車站嘅自助行李託運機嚟到完成行李托運手續，另外亦都可以直接利用A1站嘅自助報到機，輕鬆咁完成劃位同埋行李托運；唔習慣操作機器嘅人 ,同樣可以透過現場人工報到櫃檯 ，完成以上嘅手續 。

台灣嘅大眾運輸非常便利 ，再加埋市區預辦登機服務嘅啟用 ，對觀光旅客嚟講，實在太方便喇，一句講哂出國嘅時間好寶貴 ，一分一秒都唔浪費得 。台灣南部有故宮 ，中部有日月潭 ，東部有溫泉 ，每個地方仲有好出名嘅夜市 。旅客無論係搭台鐵，高鐵或者係捷運 ，都能夠令旅遊更加盡興 ，下次去寶島旅行 ，走嗰陣唔需要再大包細包啦 ， 一定要試下台灣最新啟用嘅市區預辦登機服務啦 ！！

注意事項

預辦登機地點 ：台灣機場捷運A1台北車站

可辦理登機手續嘅航空公司 ：中華航空華信航空長榮航空立榮航空
服務範圍 ：以上航空公司嘅旅客而且係當日喺「桃園機場」起飛嘅航班
服務時間 ：06：00-21：30（飛機起飛前三個鐘停止辦理手續 ）
無法受理嘅對象 ：年齡12歲以下單獨旅行嘅細路，團體旅客，攜帶寵物或者攜帶超大超長行李 （長闊高總和超過 158厘米 ,而且最長嘅一邊超過70 厘米 ）嘅旅客
溫馨提示 ：為咗避免行李託運冇經過安檢，影響之後嘅行程 ，旅客應該喺現場透過「行李查詢機」查詢係咪順利通過安檢 。